കീബോർഡ് വിപ്ലവം മുഖപുസ്തകത്തിലൂടെ...

21 ജൂലൈ 2014

ഗാസയും ദളിതരും; പിന്നെ പ്രതിലോമവികാരമണ്ടന്മാരും

1.     മനുഷ്യജന്മം മൂന്നു പേർ എവിടെ ഒത്തുകൂടിയാലും, എത്ര ഒത്തൊരുമ ഉള്ളവരായാലും മിക്കവാറും അവർക്കിടയിൽ പ്രശ്നങ്ങൾ ഉണ്ടാവുക സ്വാഭാവികം മാത്രം. അത് കുടുംബത്തിനകത്താണെങ്കിൽ  നമ്മൾ നമ്മുടെ കോമ്പ്ലക്സിനകത്ത് നിന്ന് കാരണം കണ്ടുപിടിക്കും; ഞാൻ ഇളയവനായതുകൊണ്ടല്ലേ, മൂത്തവനായതുകൊണ്ടല്ലേ, പെണ്ണുകെട്ടിയതുകൊണ്ടല്ലേ, കെട്ടാത്തതുകൊണ്ടല്ലേ, നീളം കുറഞ്ഞതിനാലല്ലേ, കറുത്തവനായതുകൊണ്ടല്ലേ തുടങ്ങി സാമാന്യം കുറേ ഞായങ്ങൾ നിരത്തി അതിൽ രക്തസാക്ഷിയായി സ്വയം അവരോധിക്കും. പിന്നെ അതിൽ പിടിച്ചു തൂങ്ങി ജീവിതം കഴിച്ചു നീക്കും.

ഇപ്പോളിതിവിടെ പറയാൻ കാരണം ചില "എഫ് ബി ഐഡികൾ" അവർക്ക് ജോലിസ്ഥലങ്ങളിലും മറ്റും നേരിടേണ്ടിവന്ന പീഡനങ്ങളെ, തന്റെ ജാതി നോക്കിയാണ് അവർ എന്നെ അങ്ങനെയൊക്കെ ചെയ്തത് എന്ന രീതിയിലുള്ള പ്രചരണം വളരെ ആസൂത്രിതമായി നടത്തിവരുന്നത് കണ്ടതുകൊണ്ടാണ്. ഈ പുരോഗമന കേരളത്തിൽ ജാതിവിവേചനം ഇല്ല എന്നു പറയാൻ തക്ക മണ്ടന്മാർ ആരും കാണില്ല. അതൊരു യാഥാർത്ഥ്യമാണ്. അതിന്ന് ചരിത്രപരമായ കാരണങ്ങളും വിശ്വാസങ്ങളുമുണ്ട്. നവോത്ഥാനപൂർവ്വകാലഘട്ട അനുഭവങ്ങളിൽ നിന്ന് ഇന്നത്തെ സാഹചര്യങ്ങളിലേക്ക് പുരോഗമിച്ച വഴികളും നമുക്കറിയാം. പക്ഷേ, ഇന്നത്തെ കാലത്ത് എല്ലാത്തരം അനുഭവങ്ങളേയും ജാതിയുടെ അധമവികാരം ചേർത്ത് മർദ്ദിച്ചു ഛർദ്ധിക്കുന്നത് നല്ലതോ എന്ന് ചിന്തിക്കുന്നത് നന്നായിരിക്കും.

നിങ്ങളൊന്ന് തിരിഞ്ഞു നോക്കുക, പണ്ട് മഅദനി മൈക്കും കെട്ടി കേരളത്തിലെ തെരുവോരങ്ങളിലുടനീളം ഛർദ്ദിച്ച, നമ്മളന്നുവരെ കേൾക്കാതിരുന്ന വടക്കൻ സംസ്ഥാനങ്ങളിലെ ഉൾഗ്രാമപ്പേരുകളും അവിടെ നടന്നുവെന്നു പറയപ്പെടുന്ന മുസ്ലിം പീഡന മസാലക്കഥകളല്ലേ നമ്മുടെ സാഹോദര്യക്കേരളത്തിലെ ആദ്യത്തെ വിഷവിത്തുപാകൽ? ആ വിത്തിൽ നിന്നു നമ്മൾ പ്രതീക്ഷിച്ച കളകൾക്ക് പകരം അവതരിച്ച ആലുകളല്ലേ കൈവെട്ടൽ-നായിത്തല വെട്ടലാദി പ്രസ്ഥാനങ്ങൾ? അതേ പോലെ ഈ ദളിത് ഇരവാദത്തിന്നു പിന്നിലും ഗൂഡ അജണ്ടകളുണ്ടെന്ന് ഞാൻ വിശ്വസിക്കുന്നു. കേരളത്തിലെ ഓരോ കവലയും 'വർക്കല'യാക്കാനുള്ള ശ്രമങ്ങളെ നാം തിരിച്ചറിയണം.

അതല്ല ഇവരുടെ ഉദ്ദേശമെങ്കിൽ ഇവരെന്തുകൊണ്ട്, സംവരണത്തിന്റെ-ഭരണഘടന നിർദ്ദേശിച്ച മറ്റ് ആനുകൂല്യങ്ങളുടെ ഗുണഫലം ഒന്നും അനുഭവിക്കാൻ യോഗമില്ലാതെ പോകുന്ന ബഹുഭൂരിപക്ഷം വരുന്ന ദളിതജന്മങ്ങളേക്കുറിച്ച് ചിന്തിക്കുന്നില്ല?  അവർക്കിടയിലെ മദ്യപാന ശീലങ്ങളേക്കുറിച്ച് ആകുലപ്പെടുന്നില്ല?* സ്വാതന്ത്ര്യാനന്തര ഭാരതം ദളിതരുടെ ക്ഷേമത്തിന്നായി ചിലവാക്കിയ പണത്തിന്റെ ദശാംശം വച്ചെഴുതാൻ പറ്റാത്ത ശതമാനം പോലും അവരിലേക്കെത്താത്തതിനേപ്പറ്റി ഒരു പഠനം പോലും നടത്തുന്നില്ല? ഉത്തരം ലളിതമാണ് അതുകൊണ്ട് ഇവർക്കെന്ത് നേട്ടം!!!!

2.           ഇതിനോട് ചേർത്തുവായിക്കേണ്ട മറ്റൊരു വിഷയമാണ് പലസ്തീൻ പ്രശ്നം സോഷ്യൽ മീഡിയവഴി സങ്കുചിത മത ഇരവാദത്തിന്നു വേണ്ടി ദുരുപയോഗം ചെയ്യുന്ന വിധം. ഫേസ്ബുക്കിനൊപ്പം അതിനേക്കാൾ എളുപ്പത്തിലും വേഗത്തിലും വാട്ട്സ് ആപ്പ് സൗകര്യം വ്യാപകമായതോടേ ഊഹാപോഹങ്ങളും അർദ്ധസത്യങ്ങളും വളരേ പെട്ടെന്ന് വൻ പ്രചാരം നേടുന്നു. നിങ്ങളുടെ സുഹൃദ് വലയത്തിൽ സാധാരണക്കാരായ, വലിയ രാഷ്ട്രീയ ബോധമില്ലാത്ത മുസ്ലിം സുഹൃത്തുക്കൾ ആരെങ്കിലും ഉണ്ടെങ്കിൽ നിങ്ങൾ ഗാസാഇരവാദഭീകരചിത്രങ്ങൾ നിങ്ങളുടെ മനസ്സിന്നേയും വെറുപ്പിച്ചു കാണും. എനിക്ക് ആത്മസുഹൃത്തുക്കളായുള്ളവരെല്ലാം മുസ്ലിം സഹോദരങ്ങളായതുകൊണ്ടാവാം, "എന്താണ് പലസ്തീൻ പ്രശ്നം എന്നറിയാമോ?, ആരാണീ ഹമാസ്? എന്താണ് ഇപ്പോഴത്തെ പ്രശ്നം? എന്താണിതിന്നു പോംവഴി? തുടങ്ങിയ ചോദ്യങ്ങൾ പലവുരു ചോദിക്കേണ്ടിവന്നു. എന്റെ അനുഭവത്തിൽ തൊണ്ണൂറു ശതാമാനത്തിനും അറിയില്ല. പലസ്തീനിലെ "മുസ്ലിങ്ങൾ" പീഡിപ്പിക്കപ്പെടുന്ന എന്ന അറിവുമാത്രം മതവികാരത്തിൽ പൊതിഞ്ഞ് കുത്തിവയ്ക്കപ്പെടുന്നു.

നിങ്ങൾ എന്തുകൊണ്ട് എണ്ണുവാനാവാത്ത വിധം അഫ്ഗാനിസ്ഥാനിലും സിറിയയിലും ഇറാഖിലും കൊല്ലപ്പെടുന്ന 'മുസ്ലിം ജീവനു'കളേക്കുറിച്ച് ആകുലപ്പെടുന്നില്ലാ എന്ന 'സൈബർ ക്ളീഷേ' ചോദ്യം പലരേയും ശത്രുക്കളുമാക്കി മാറ്റുന്നു. 

വിവരത്തിന്നു പകരം വികാരം തേടി അലയുകയാണല്ലോ ഇന്നിന്റെ നമ്മുടെ തലച്ചോറുകൾ... തുലയട്ടെ മനുഷ്യകുലം ജാതിയും മതവും തമ്മിലടിക്കാനും തമ്മിലടിപ്പിക്കാനുമുള്ള കുറുക്കൻ വഴികൾ മാത്രമായി ഉപയോഗിക്കപ്പെടുമ്പോൾ മനുഷ്യമനസ്സുമാത്രമുള്ളവർക്ക് സ്വയം നൊൻപരപ്പെടുക എന്നതിൽ കവിഞ്ഞൊന്നും ചെയ്യാനില്ലെന്ന തോന്നൽ.........

*ഈയൊരു ചോദ്യം മതി ദളിതരെ മദ്യപരെന്ന് ആക്ഷേപിച്ചെന്ന പരാതി ഉയരാൻ!

22 ജൂൺ 2014

ചക്രസ്തംഭന സമരത്തിന്നു അഭിവാദ്യങ്ങൾ

കാൾ മാർക്സ് മുന്നോട്ട് വച്ച ആശയങ്ങൾ കാലഹരണപ്പെട്ടതാണെന്ന് വാദിക്കുന്നതിൽ മുൻപന്തിയിൽ ഇന്ന് നിൽക്കുന്നത് ആ ആശയങ്ങളേക്കുറിച്ച് സാമാന്യവിവരം നേടിയ പലരുമാണെന്നത് എന്നേപ്പോലുള്ള സാധാരണക്കാരെ വല്ലാതെ അലോസരപ്പെടുത്തുന്ന വസ്തുതയാണ്. പക്ഷേ വെറും സാധാരണ മനസ്സുകൊണ്ട് ചിന്തിക്കുമ്പോൾ നമ്മൾ തലതിരിഞ്ഞ് എത്തിപ്പെടുന്നത് ശരിക്കും മാർക്സിസ്റ്റ് ആശയങ്ങളുടെ അനിവാര്യതയിലേക്ക് തന്നെയാണ്.

ഇത് പറയാൻ കാരണം ഇന്നലെ ശ്രദ്ധയിൽ പെട്ട ഒരു സമരാഹ്വാനമാണ്. കേരളത്തിലെ മോട്ടോർ തൊഴിലാളികൾ അവരുടെ നിലനിൽപ്പിന്നെ ബാധിക്കുന്ന പ്രശ്നങ്ങൾ ഉയർത്തിക്കാട്ടി ഈ വരുന്ന ജുലൈ ഒന്ന് രണ്ട് തീയതികളിൽ ചക്രസ്തംഭനം എന്ന പേരിൽ ഐതിഹാസിക സമരത്തിന്ന് ആഹ്വാനം ചെയ്തിരിക്കുകയണ്. സാധാരണ സമരങ്ങൾക്ക് നേതൃത്വം നൽകാറുള്ള ഇടതുപക്ഷം മാത്രമല്ല, സംഘപരിവാർ മുതൽ തനി വർഗ്ഗിയാടിസ്ഥാനത്തിൽ മാത്രം സംഘടിക്കുന്ന മുസ്ലിം ലീഗാദി സംഘങ്ങളുടെ ട്രേഡ് യൂണിയനുകൾ വരെ ഒറ്റക്കെട്ടായി വർഗ്ഗസമരത്തിൽ അണിചേരുന്നു. രണ്ട് മാസം മുൻപ് വരെ കേരളത്തിലെ തെരുവുകളിൽ മാർക്സിസ്റ്റ് ചിന്താഗതികളെയും വർഗ്ഗസമരസിദ്ധാന്തങ്ങളെയും പുച്ഛിച്ച് നടന്നവർ ഇന്ന് അവരുടെ നിലനിൽപ്പിന്റെ പ്രശ്നം വരുമ്പോൾ ഈ മേഖലയിലെ ശക്തരായ സി.ഐ.ടി.യുവുമായി ചേർന്ന് ഇത്തരത്തിൽ സമരം നടത്തുന്നത് കാണുമ്പോൾ, തോളിൽ കയ്യിട്ട് സമരപ്രചരണം നടത്തുന്നത് കാണുമ്പോൾ രോമാഞ്ചം വരാതെയില്ല. അത് ഇവിടെ ആദ്യത്തെ അനുഭവമൊന്നുമല്ല. ഉദ്ദേശം ഒരു വർഷം മുൻപ് ഭാരതത്തിലുടനീളം ട്രേഡ് യൂണിയനുകൾ ഇത്തരത്തിൽ ഐക്യപ്പെട്ട് രണ്ട് ദിവസത്തെ സമരം ചെയ്തപ്പോൾ ആ വികാരം ഉൾക്കൊണ്ട്, ഭാരതത്തിലെ ഏറ്റവും വലിയ മുതലാളിത്ത വിഗ്രഹമായിരുന്ന അന്നത്തെ പ്രധാനമന്ത്രി മന്മോഹൻ സിങ്ങ് പ്രതികരിച്ചതും ഓർമ്മവരുന്നു.

ഇത്രയേ പറയാനുള്ളൂ, മാർക്സിയൻ ആശയങ്ങൾക്ക് കാലഹരണം എന്നൊന്നില്ല.

‌-------------------------------------------------------------------------

കേരള സർക്കാർ മിൽമ്മ വഴിയുള്ള പാൽ വിതരണ സംവിധാനത്തിന്ന് വിലവർദ്ധിപ്പിക്കാൻ അനുമതി നൽകുന്നു എന്ന വാർത്തവരാൻ തുടങ്ങിൽപ്പോൾ തന്നെ ഉപഭോക്തൃമനസ്സുകളിൽ നിന്ന് രോഷം നിറഞ്ഞ വാക്കുകൾ ഉതിരാൻ തുടങ്ങി. അല്ല ഉപഭോക്താക്കളെ നിങ്ങൾ ചിന്തിച്ചിട്ടുണ്ടോ ക്ഷീരകർഷകരുടെ ആവലാതികൾ? ഡീസൽ വിലയുടെ അനക്കം കേൾക്കുമ്പോൾ നാഴിക വച്ച് ബസ്സ് ചാർജ്ജ് വർദ്ധിപ്പിക്കുമ്പോൾ മിണ്ടാതിരിക്കുന്ന നിങ്ങളെന്തേ ക്ഷീരകർഷകന്ന് നാമമാത്ര വിലവർദ്ധനാനുകൂല്യം നൽകുമ്പോൾ മുറുമുറുക്കുന്നു?

എന്റെ അഭിപ്രായത്തിൽ കേരളത്തിലെ ക്ഷീര കർഷകർ കൂടുതൽ സംഘടിതരാകേണ്ടിയിരിക്കുന്നു. ന്യായമായ വരുമാനത്തിന്നു വേണ്ടി പോരാടേണ്ടിയിരിക്കുന്നു.

26 ജനുവരി 2013

ചക്കക്കുരുവിന്റെ വിശ്വരൂപം

ചക്കക്കുരു പ്രോട്ടീനും മറ്റ് പോഷകങ്ങളും നിറഞ്ഞ വളരെ നല്ല സാധനമാണ്.

പക്ഷേ ദഹനശേഷി കുറഞ്ഞവർ അത് അമിതമായി കഴിച്ചാൽ വല്ലാതെ 'വായൂന്റെ' പ്രശ്നമിളകും.


വായൂന്റെ കഥകൾ അറിയാമല്ലോ, നാറ്റിക്കും പൊട്ടിത്തെറിക്കും പിടിത്തമുണ്ടാക്കും പറഞ്ഞറിയിക്കാനാവാത്ത വേദനയുമുണ്ടാക്കും.


വായൂന്റെ നല്ല മരുന്നുകൾ ഏതെങ്കിലും കഴിച്ചാൽ താൽക്കാലിക ആശ്വാസം മാത്രം.

ജന്മനാ ദഹനക്കേടുള്ളവർ മനപ്പൂർവ്വം നാട് മുഴുവൻ നാറ്റിക്കണം എന്ന ഉദ്ദേശത്തോടെ മാത്രം പിന്നെയും പിന്നെയും ചക്കക്കുരു തിന്ന് വളിവിടും; നാട് നാറ്റിക്കാൻ മാത്രമായി ചക്കക്കുരു തിന്നുന്ന ആ രോഗത്തിന്നു വേറെ മരുന്നില്ല.

ഇവിടെ നമുക്ക് ആരെ കുറ്റം പറയാം?
ചക്കക്കുരുവിനെയോ
ദഹനശേഷിയില്ലാത്ത വയറിനെയോ
വളിയെയോ
അതോ നാട്ടിൽ വളിവിട്ട് മറ്റുള്ളവർക്ക് ശല്യമുണ്ടാക്കരുതെന്ന് കലകളിലൂടെ ബോധവത്കരിക്കുന്നവരെയോ?
 

03 ജനുവരി 2013

"എന്നേ ഒന്ന് കടിച്ചു തിന്നൂ..."

ഇന്ന് കാലത്ത് ബജാറിൽ പോയരം ഒരു ഫ്രൂട്ടിന്റെ പീട്യ കണ്ടു.

എന്തല്ലം തരം ഫ്രൂട്ട് മോനേ ആട ഉള്ളത്!

ചോന്നത്, മഞ്ഞ, പച്ച എല്ലാ നെറോം ഉണ്ട്...

എല്ലം നല്ലോണം തുടുത്ത് നല്ല ഷേപ്പിലുള്ളത്...

കാണുമ്പം തന്നെ വായിൽ 'വെള്ളം' പൊട്ടീന്ന്,

ആപ്പിൾ തന്നെ എന്തെല്ലം തരമ്ന്നാ... സാദാ ആപ്പിള്, മെഴുക്പുരട്ടി തിളക്കം കൂട്ടിയത്, നല്ല തെർമോകോളിന്റെ കുപ്പായമിടീച്ചത്.. (അതിൽ കുപ്പായമിട്ട ആപ്പിളിനോടാ എനക്ക് പിരിസം കൂടുതൽ തോന്ന്യേ..! കുപ്പയമൂരീട്ട് ഒരിക്ക കടിക്കാൻ കിട്ടിനെങ്കില് എന്ന് നിരീച്ച് പോയി...)

പക്കേ എന്താക്കാന്ന്..? അതെല്ലം എനക്ക് പല കാരണങ്ങളാൽ 'അപ്രാപ്യ'മായിരുന്നു.


പിന്നെന്താക്കാന്ന്....., നോക്കി വെള്ളം എറക്കീട്ട് വന്നു.

നീയാണെങ്കീ എന്താക്കട്ടീന്ന്? കട്ടിറ്റ് തിന്ന്വോ? അങ്ങനാക്ക്യാ തല്ലുകിട്ടൂലേ?
പൊലീസ് പിടിക്കൂല്വേ? പത്രത്തിൽ പോട്ടം വരൂലേ?

അമ്മ പണ്ടേ പറഞ്ഞിറ്റ്ണ്ട്....
അങ്ങനത്തെ ഒന്നും കണ്ടിറ്റ് മോഹിക്കണ്ടാന്ന്, അതൊന്നും നമ്മക്ക് പറഞ്ഞതല്ലാന്ന്...

അതോണ്ട് എനക്കും നല്ലത് ഫ്രൂട്ടിന്നും നല്ലത്!













30 ഡിസംബർ 2012

ബോൺലെസ്സ് ഇറച്ചി സുക്ക; അറേബ്യൻ പാചകം

പാചകം - സുക്ക*
-------------------
ചേരുവകൾ:

എല്ലില്ലാത്ത ഇറച്ചി (തൊലികളഞ്ഞ്**) : അരകിലോ.

കുരുമുളക് പൊടി : 4ടീസ്പൂൺ.

മഞ്ഞൾപൊടി : 1ടീസ്പൂൺ.

മല്ലിപ്പൊടി : 2ടീസ്പൂൺ.

ഗരം മസാല : 1ടീസ്പൂൺ.

എണ്ണ : 4 ടേബിൾ സ്പൂൺ.

ഇഞ്ചി-വെള്ളുള്ളി പേസ്റ്റ് : 1ടീസ്പൂൺ.

കല്ലുപ്പ് : ആവശ്യത്തിന്ന്.

കറിവേപ്പില : മനസ്സുപോലെ.



പാചകവിധി:


നന്നായി കഴുകിയെടുത്ത ഇറച്ചിക്കഷണങ്ങളിൽ പൊടിമസാലകളും പേസ്റ്റും ചേർത്ത് നന്നായി കുഴച്ച് പിടിപ്പിക്കുക.


അങ്ങനെ അരമണിക്കൂർ സൂക്ഷിച്ചശേഷം, കുക്കറിലോ ചട്ടിയിലോ നൂറുമില്ലി (അധികരിക്കരുത്) വെള്ളവും ഉപ്പും 

ചേർത്ത് ചെറുചൂടിൽ പതിനഞ്ച് മിനുട്ട് വേവിച്ചെടുക്കുക.


ഇറച്ചി നന്നായി വെന്തുവന്നാൽ എണ്ണയും കറിവേപ്പിലയും ചേർത്ത് നന്നായി വഴറ്റുക.


സുക്ക റെഡി!



*സൗദി ഒറിജിൻ സൈഡ് ഡിഷുകളിൽ പ്രധാനിയാണ് ഈ സുക്ക. അറേബ്യൻ 'വിഭവ'ങ്ങൾക്ക് ഭാരതത്തിൽ ആരാധകർ 

വർദ്ധിച്ചുവരുന്ന വേളയിൽ പ്രയോഗിക്കാൻ എളുപ്പമുള്ള പാചകവിധിയാണിത്.



**നേരത്തെ 'തൊലികളഞ്ഞ' ഇറച്ചിയാണെങ്കിൽ വീണ്ടും തൊലികളയാൻ പോവണ്ട.

മുന്നറിയിപ്പ് 1: മൂലക്കുരു ഉള്ളവർ ഉപയോഗിക്കരുത്. (മൂലം പൂരാടം ആവും)

മുന്നറിയിപ്പ് 2:  ഇത് വെറും പാചക കുറിപ്പ് മാത്രമാണ്. മറ്റെന്തെങ്കിലും നിങ്ങൾ കണ്ടെത്തുന്നുണ്ടെങ്കിൽ മുൻവിധി 

എന്ന വാക്ക് ധന്യമായി!







25 ഡിസംബർ 2012

ഫേസ്ബുക്കിൽ റേപ്പിസ്റ്റ് ലേബലൊട്ടിക്കാൻ നടക്കുന്നവരോട് .....

'എന്റെ' നിരീക്ഷണത്തിൽ, എന്റെ ജീവിതസാഹചര്യങ്ങളിൽ ലഭ്യമായതിൽ വച്ച് ഏറ്റവും നന്നായി ജനകീയ പ്രശ്നങ്ങളിൽ ഇടപെടുന്നതെന്നു തോന്നിയ- സിപിഐ എമ്മിന്റെയും അവരുടെ പോഷക സംഘടനകളുടേയും മുതൽ,
ഇസ്ലാമിക രാജ്യം സ്ഥാപിക്കുക എന്ന അടിസ്ഥാന ആശയത്തിലൂന്നി, മറ്റൊരു കുപ്പായമിട്ട് പൊതു മണ്ഡലത്തിൽ പ്രവർത്തിക്കുന്ന ജമാ അത്തെ ഇസ്ലാമിയുടെ പോഷകസംഘടനകൾ വരെ നടത്തിയ സമരങ്ങളിലും കൂട്ടായ്മകളിലും പലപ്പോഴും പരപ്രേരണകൂടാതെ തന്നെ പങ്കെടുത്തിട്ടുള്ള, ഒരു പാർട്ടി സെക്രട്ടറിയുടെ ചീട്ടിന്നും കാത്തു നിൽക്കാത്ത ഒരു സാദാ പൗരൻ മാത്രമായ എനിക്ക് ഒരിക്കലും ഒരു ജനകീയ സമരോത്തോടും പുച്ഛം തോന്നാറില്ല.

പക്ഷേ, ഒരു പെൺകുട്ടി നീചമായ ലൈംഗിക ആക്രമണത്തിന്നു തലസ്ഥാന നഗരിയിൽ ഇരയായതിന്റെ വികാര വിസ്ഫോടനമെന്നോണം സൈബർ കൂട്ടായ്മകളുടെ ആഹ്വാന പ്രകാരം ഭരണസിരാകേന്ദ്രങ്ങളിൽ യുവജനത തടിച്ചു കൂടി ലഹളയുണ്ടാക്കുന്നതിനെ, എന്താണ് മുദ്രാവാക്യം, എന്തൊക്കെയാണ് ഡിമാന്റുകൾ, അതിൽ ഇന്നത്തെ നിലയിൽ സർക്കാറിന്ന് എന്ത് ചെയ്യാനാവും തുടങ്ങിയ കാര്യങ്ങളിൽ വ്യക്തതയില്ലാതെയുള്ള സൈബർ മീറ്റ് വെറും ന്യൂജനറേഷൻ ലഹളമാത്രമായി മാറുന്നുവെന്നു തോന്നിയതു കൊണ്ട് തന്നെ എന്റെ മനസ്സിന്നിനിയുമിതിനെ അംഗീകരിക്കാനാവുന്നില്ല. യുപിഎ സർക്കാറിന്റെ മുഴുവൻ നയങ്ങളോടും എതിർപ്പുണ്ടെന്നതു കൊണ്ട് മാത്രം വെറുതേ സർക്കാറിനെ സമ്മർദ്ദത്തിലാക്കുക എന്ന തന്ത്രത്തോട് മമത തോന്നുന്നില്ല. കീബോർഡിൽ ചൊറിഞ്ഞത് കൊണ്ട് ദുഷിച്ച വ്യവസ്ഥിതികൾക്ക് എന്തെങ്കിലും മാറ്റം വരുമെന്ന ചിന്തയുമില്ല

ഈ ഒരഭിപ്രായം ഞാൻ ഫേസ് ബുക്കിലൂടെ പങ്കുവച്ചപ്പോൾ, ലഹളയുടെ വികാരാവേശം തലയ്ക്കു പിടിച്ച ഉന്മാദത്തിൽ, അതിന്റെ സത്ത മനസ്സിലായില്ലെന്നഭിനയിച്ച നിങ്ങൾ ഞാൻ ഒരു ബലാത്സംഗ  അനുകൂലിയും രാഷ്ട്രീയ പാർട്ടികളുടെ വേദനയിൽ ഭയക്കുന്നു എന്നൊക്കെ പറഞ്ഞത് എനിക്ക് ശരിക്കും മനസ്സിലായി.

പക്ഷേ ചില ഫേസ് ബുക്ക് കൊച്ചമ്മമാർ നാടു നീളെ ഓടി നടന്ന് ഞാനും ഒരു റേപ്പിസ്റ്റ് എന്ന കണക്കേ ചാറ്റും സ്റ്റാറ്റസ്സും കമന്റുകളുമായി ഓടിനടക്കുന്നതിനേക്കുറിച്ച് എന്റെ ഒരു സ്റ്റാറ്റസിൽ പരാമർശിക്കുന്നതിന്നിടെ, പരിഹാസ ഭാവത്തിൽ ലക്-നോട് "ഫേസ് ബുക്ക് ഇപ്പോൾ പേരുമാറ്റാൻ എന്നെ അനുവദിക്കുന്നില്ല,അല്ലെങ്കിൽ Baiju The Rapist എന്നു പേരുമാറ്റിയേനെ!" എന്ന് പറയേണ്ടി വന്നത് സന്ദർഭത്തിൽ നിന്ന് അടർത്തിമാറ്റി അദ്ദേഹത്തിന്റെ ടൈംലൈനിൽ കൊണ്ട് പോയി എന്നെ വിമർശിക്കുകയുണ്ടായി. ശരിക്കും നമ്മുടെ മനോരമ മോഡൽ വളച്ചൊടിക്കൽ. 

'നാലാൾ കാണാനുണ്ടെന്നു വരുമ്പോൾ എന്തും പറയാമെന്ന സ്ഥിതിവരും' എന്ന അജിത്തേട്ടന്റെ കമന്റ് അതിലും നിരാശാജനകം എന്ന് തന്നെ പറയേണ്ടിവരും. നമ്മളെല്ലാവരും ഇവിടെ എന്തെങ്കിലും പറയുന്നുണ്ടെങ്കിൽ അത് കാണുന്ന ആളുകൾക്ക് വേണ്ടി മാത്രമാണോ? നമ്മളിൽ ഭൂരിപക്ഷത്തിന്റെ അഭിപ്രായത്തിന്ന് ന്യൂനപക്ഷം ചിന്തകൾ കീഴടങ്ങി  മിണ്ടാണ്ടിരിക്കണമെന്നോ?

 ആ വഴിക്കു വന്ന മറ്റ് വിമർശനങ്ങൾക്കും നിരീക്ഷണങ്ങൾക്കും വഴിയേ മറുപടി തരാം.

എനിക്കിപ്പോഴും എത്ര ആലോചിച്ചിട്ടും ഈ ലഹളയോട് അനുഭാവം പ്രകടിപ്പിക്കാൻ തോന്നുന്നില്ല, അതിന്റെ പേരിൽ നിങ്ങളെന്തു വിളിച്ചാലും! പക്ഷേ ലേബലൊട്ടിക്കാൻ നടക്കും മുൻപ് എന്താണ് പറഞ്ഞതെന്ന് വിവേകത്തോടെ മനസ്സിലാക്കാനുള്ള വകതിരിവ് .........

+

ഞാൻ സൈബർ മലയാളം കാണുന്ന ആദ്യ നാളുകളിൽ കണ്ട് പഠിച്ചതും ഈ മാധ്യമത്തിന്റെ സാധ്യതകൾ മനസ്സിലാക്കിയതും 'കൂട്ട'ത്തിലൂടെയുള്ള ലക്-, അജിത്തേട്ടൻ, സമീരൻ, കുമാറണ്ണൻ തുടങ്ങിയവരുടെ ഉശിരൻ അഭിപ്രായ പ്രകടനങ്ങൾ കണ്ടാണ്. ഇപ്പോൾ എന്റെ ഒരു കമന്റിനെ ചുറ്റിപ്പറ്റി നിങ്ങൾ വിമർശനമുന്നയിക്കുന്നു. ശരിക്കും ഞാനൊന്ന് അഹങ്കരിച്ചോട്ടേ സുഹൃത്തുക്കളേ?




18 ഡിസംബർ 2012

ഹെഡ്മാഷിന്റെ ലാപ്ടോപ്പ് റൂളിങ്ങ്; ഒരു പിന്നാമ്പുറക്കഥ

'അപ്പൂപ്പാ.... അപ്പൂപ്പാ...'

'എന്താടാ കൊച്ചു രാമാ..?'

'അപ്പൂപ്പനെന്തിന്നാ, 'ആ' ഉസ്കൂളിന്റെ ഹെഡ്മാഷാണെന്നു പറഞ്ഞ് ഗമയിൽ നടക്കുന്നത്?'

'അതെന്താടാ എനിക്ക് ഗമയിൽ നടന്നൂടേ?'

'നടന്നോളൂ.., പക്ഷേ, പത്രം തൊറന്നാൽ അതിൽ നിങ്ങളെ ഉസ്കൂളിലെ മാഷന്മാരും പുള്ളോരും ഉസ്കൂൾ സമയത്ത് ഇരുന്നൊറങ്ങുന്ന പോട്ടം, ചാനൽ തുറന്നാ ആ വിഷ്വലുകളും മറ്റേടെത്തെ മൂസിക്കുമിട്ട് പരിഹാസം, ഫേസ് ബുക്കീക്കേറിയാപ്പിന്നെ പറയോം വേണ്ട.....'

'അതേടാ... എനിക്കും സങ്കടമുണ്ടെടാ കൊച്ചുരാമാ..,
പക്ഷേ ഞാനെന്തു ചെയ്യാനാടാ..., ശ്വേത കേമറയ്ക്കു മുന്നിൽ പെറ്റാൽ എനിക്ക് അവരെ കുറ്റം പറയാം; ഇവന്മാരെ കുറ്റം പറയാൻ പറ്റൂല..  അവന്മാരുടെയൊക്കെ ഔദാര്യത്തിലല്ലേ ഞാനാട ആ കസേരെലെങ്കിലും കുത്തിയിരിക്കുന്നത്..?'

'ഞാനൊരു വഴികണ്ടിട്ടുണ്ട് അപ്പൂപ്പാ..'

'എതാടാ ആ വഴി?'

'ഞാൻ മൊടങ്ങാതെ ഉസ്കൂളിൽ പോകുന്നതെന്തിന്നാ?'

'പഠിക്കാൻ, അല്ലാതെ പിന്നെന്തിന്ന്?'

'പഠിക്കാനൊന്നുമല്ലപ്പൂപ്പാ...'

'പെമ്പിള്ളേരെ വായി നോക്കാനും കൊഞ്ചിക്കൊഴയാനും...'

'അതും ഇതും തമ്മിലെന്താ ബന്ധം?'

'അപ്പൂപ്പന്റെ ഉസ്കൂളിൽ പെമ്പിള്ളേർ മരുന്നിന്നു പോലും ഇല്ലാന്നറിയാം,
അതോണ്ട്.... ഉസ്കൂളിൽ വരുമ്പോ ലാപ്ടോപ്പും നെറ്റ് സെറ്ററും ഐ പാഡും കൊണ്ടുവരാമെന്ന് നിയമമുണ്ടാക്ക്...'

'അതോണ്ടെന്താ ഗുണം കൊച്ചുരാമാ..?'

'അതൊക്കെ കൊണ്ടുവരാന്നായാൽ, മാഷന്മാരും പുള്ളോറും ബോറടിക്കുമ്പം, അതിൽ 'കുത്തി'ക്കളിച്ചോണ്ടിരിക്കുമല്ലോ?
ഫേസ് ബുക്കിൽ ചാറ്റട്ടെ, തുണ്ടുകൾ കണ്ട് രസിക്കട്ടെ; അങ്ങനെ ഉറക്കത്തെ അകറ്റാം...'

'നീയാളു കൊള്ളാമല്ലോ കൊച്ചുരാമാ...'

'പിന്നേ....'

*

അങ്ങനെ അന്ന് ഉസ്കൂളിൽ റൂളുകളുരുണ്ടു.

*

ഇനി ആരും ഇരുന്ന് ഉറങ്ങാത്ത ഉസ്കൂൾ കാലം.

*

ഈ ഉറക്കമില്ലായ്മ്മ ഒരു പ്രശ്നമാവുകയാണെങ്കിൽ, 'തുണ്ടുകൾ' തൊണ്ടയിൽ കുടുങ്ങുവാണെങ്കിൽ- ഭയപ്പെടേണ്ട; നമുക്ക് വഴികാട്ടിയായി കർണ്ണാടകത്തിലെ 'റൂളറു'കളുണ്ട്, 'കീഴ്'വഴക്കങ്ങളുണ്ട്...

ഗോ എഹെഡ്!












.